How-to-choose-digital-marketing-agency-P2-arabic-content

إزاي تختار شركة التسويق الرقمي-جزء ثان

زي ما إفتتحنا الجزء الأول من مقال إزاي تختار شركة التسويق الرقمي بإن في شركات بتفشل وتقفل بسرعة رغم بدايتها الواعدة ، هاكمّل معاك النقاط الباقية إللي تعرف من خلالها إزاي تختار شركة التسويق الرقمي اللي تحققلك الأهداف الرئيسية لتعاقدك معاهم

هل الشركة مؤمنة بالتخصص الوظيفي ♦

بشكل عام جدا ، لو لقيت إللي بيكتب المحتوى هو نفسه اللي بيرد على التليفون وبيقوم بالإعلانات والتصميمات والمتابعة أحيانا. الشغلانة دي صعب تقوم على شخص واحد إلا إذا كان فريلانسر مُتمكن من أدواته ودارس ومطبق كل عنصر لوحده أكتر من سنة مثلا. وده تنين ، مش مستحيل تلاقيه ، بس صعب

وبشكل تفصيلي ، فإحنا عندنا مثل عربي شهير بيقول إعرف شئ عن كل شئ ، ثم أعرف كل شئ عن شئ

صاحبنا بقى ياخد الكلام ده ويمشي بيه. فيلاقي إن (معرفة شئ عن كل شئ) مش صعبة. فيتعلم يكتب سطرين أو أكتر على الكيبورد بيجيبوا لايكات لطيفة ، ويتعلم يعمل إعلان بسيط لدرجة إنه بـ10 جنيه هايبقى معاه فيزا مشتريات على الأنترنت يقدر يستخدمها في الإعلانات وأهي شغالة وبتسحب. ويدخل علي يوتيوب يجيب دروس فوتوشوب ويقعد يتعلم إزاي يعمل “تصميمات السوشيال ميديا” واللي بتكون عادتًا منحوتة من صفحة جنبه بتعمل نفس التصميمات

بس لما الموضوع كبر ولقى إنه محتاج (يتعلم كل شئ عن شئ) لقى نفسه في متاهة ، لأن كل شغلانة من اللي فوق ليها تخصصاتها ، وتفريعاتها اللامنتهية ، فبيشوف إنها الرحلة الأصعب ويقرر يمشيها بالحُب. أو يشوف الطريق الأصعب هو الطريق الأصح واللي لما بيمشي فيه بيلاقي مع الوقت والمجهود تطور مستواه بيتلاحظ وبيقدر يكون مُتخصص فعال جوه شركة تحترم التخصصات الوظيفية

لذلك ، خليك دايما في تعاملاتك مع اللي حواليك سواء أفراد أو شركات إنك تتعامل مع متخصصين. مش أشخاص بتقدم كل حاجة بفلوس وكله علي قد محفظتك

هل الشركة عندها سيستيم واضح ♦

والحقيقة إنها زي أول نقطة هتبان جدا من أول تعامل ، عشان كده الجزء ده هايكون زي دليل للتعامل مع شركات مفيهاش سيستيم ، لأننا ببساطة لو حبينا نتكلم عن السيستيم في الشركات وإزاي بيتبطق هنقول بديهيات ، لذلك قررنا نقولها بس بشكل بديهي برده. وده منتهى الكرياتيفيتي

أطلب منهم إن كلامك يكون مع شخص (واحد محدد صريح) وإن ميوصلش مكالمات من أي شخص غيره

نزل إعلان إنك طالب (مفاوض) ودول ممكن تشتغل معاهم بالساعة. وتخليه هو المتحدث لشركتك عشان إنت بطبيعة الحال وراك شغل

أطلب منهم خطة موجزة وخطة مُفصلة بالخطوات اللي هينفذوها لشركتك مع وضوح تأثير الخطوات دي على مدى الإستثمار اللي إنت بتدفعه

خلي في بند في العقد خاص بغرامات تأخير التسليم

خلي إطلاعك على معدلات الصرف بشكل حي مش من خلال سكرين شوت. ويفضل يكون صرف الإعلانات من الفيزا الشخصية ليك لو إنت حاسس إن الشركة مش إحترافية كفاية

خلى محادثاتك مع الشركة مكتوبة ، سواء إيميلات أو رسايل ، أهم حاجة تكون مكتوبة

أكيد في نقاط تاني تقدر تعملها مع الشركات اللي مفيهاش سيستيم ، لكن يفضل طبعا إن تعاملك يكون مع شركة ليها سيستيم واضح عشان تقدر تساعدك على تحقيق أهداف البيزنس الخاص بيك

وفي الختام ♦

إيمانك وإهتمامك الشخصي بأهمية التسويق لشركتك أو مؤسستك ، هايديك كتير من الخبرات اللي تختار من خلالها الشركة الأفضل لتحقيق أهدافك من التسويق الرقمي

تصنيفات