إزاي-تخسر-1500-دولار-في-90-يوم

إزاي تخسر 1500دولار في 90 يوم

في المقال ده هاتعرف إزاي تخسر 1500$ في 90 يوم بدون أي مجهود. كل اللي عليك ، إنك تفتح شركة

بعد ما فتحت المشروع بتاعك وكلفّته الشئ الفُلاني ، قولت لنفسك :- أنا لازم أفكر صح وأتعاقد مع وكالة تسويق رقمي تمسكلي الشغل ويجيبولي مبيعات كتييير ولايكات وأبقي علوضعي

فبدأت تشوف عروض شركات كتير لغاية ما لقيت الشركة المتخصصة في التسويق على فيسبوك، واللي هاتجيبلك 100.000 لايك في حملة واحدة ، فعملت الإتصال ، قعدتوا في الميتنج ، إتفقتوا ، ولقيت أسعارهم حلوة جدا ، 500 $ في الشهر ، إنسبطت جدا وقومتوا حاضنين بعض ورجعت بيتك بتحلم باللايكات الكتير والردود والبيع والمكسب والزهر يعلب بقى

علي الجانب التاني ، بتبدأ الشركة تعملّك إعلانات كتير ، وصور البيزنس بتاعك ومنتجاتك وبيقولوا للناس إشتري دلوقتي وبيهزروا معاهم وبيتكلموا مع المتابعين في الكومنتات ويردّوا عليهم بـ “تحت أمرك يا فندم” و “تنورنا في 58 ش الشهيد حماده” وبيعملوا كل المجهود اللي في الدنيا

بعد 90 يوم ، بتقعدوا مع بعض وتكسّروا كل الكراسي اللي في الدنيا فوق بعض بسبب إن الشركة محققتش للبيزنس بتاعك أكتر من 10 مبيعات علي بعض ، وهما شايفين إنهم عملوا كل اللي عليهم وزيادة وإنت اللي “عميل مصري” مش فاهم طبيعة شغلهم الكبير

الحالة دي بتحصل تقريبا كل يوم ، بإختلاف العملاء والشركات والعروض ، وعشان متقعش في الفخ ده دلوقت أو بعدين ، هقولك إيه الأخطاء اللي وارد تقع فيها وإنت بتشتغل في  التسويق على فيسبوك للبيزنس بتاعك أو لو إنت بتشتغل في شركة تسويق رقمي

بالنسبة للإعلانات ♦

لازم تحدد شريحة الجمهور اللي هاتستهدفها للمنتج بتاعك ، التحديد ده يشمل (السن – المكان الجغرافي – النوع – والإهتمامات ودي تقريبا من أهم العوامل في تحديد الفئة المُستهدفة ، بجانب  السلوكيات المتسجلة على لوحة الإعلانات اللي بتسخدمها سواء على فيسبوك أو على جوجل 

لازم كمان تراقب العملاء اللي إنت هاتستهدفهم متعودين يكونوا موجودين على الموقع اللي شغال عليه في أنهي وقت في يومهم ، عشان تقدر تفعّل الإعلان في الأوقات الصحّ والمناسبة لجمهورك

متكررش نفس الإعلان علي نفس المحتوى أكتر من مرة إلا لو بتغير في الفئة اللي بيروح لها الإعلان ، حاول دايما توظف مجهودك أكتر على إنك تلاقي الجمهور المناسب ليك مش إنك تعمل إعلانات وبس

بالنسبة للمحتوى ♦

السوشيال ميديا مش مكان لطيف لإعلانات “الشركة السعودية” أو يفط الكباري ، ومفيش أي فنّ أو حرفّنة في إنك تعمل تصميم متروس كلام كتير ملخصه “تعالي إشتري المنتج بتاعنا” فـ بلااااش

الوصف اللطيف اللي ميزيدش عن 140 حرف علي صورة المنتج ده مش محتوى قيم ممكن يخليك تبيع منتجات على المدى البعيد ، ممكن يبقي إرتجال ، ممكن يبقي أي حاجة تاني غير إنه محتوى هدفه يعمل تسويق فعّال للبيزنس بتاعك ، الموضوع محتاج حبّة مجهود

Insightsبالنسبة للـ ♦

النقطة دي بالذات لو إنت صاحب بيزنس مش هاتعرف تستفاد منها بفاعلية زي ما لو كنت شخص بيشتغل في شركة تسويق رقمي محترفة ، لأنه التحليلات ودراستها بدقة هو اللي بيحقق على المبيعات اللي بتدور عليها على المدى البعيد

أوعى ، أوعى ، أوعى تنزل 2 بوست أو مقال ورا بعض من غير ما تدرس التحليلات مابينهم ، إنت كده حرفيا بترمي مجهودك وفلوس العميل في الأرض

Respondingبالنسبة للـ ♦

بلاش تاخد نفس الرد وتعمله تكرار  على كل الكومنتات ، ده مسموش تجاوب مع العميل أبدا وبيحولك مع الوقت لآله ردود تلقائية بتقلل ثقة متابعينك ليك

زي ما في الواقع محدش هايكلمك لو مرديتش عليه ، فشغلك على السوشيال ميديا برده محدش هايعبرك لو ملاقوش إنك بتعاملهم علي إنهم بني آدمين مُختلفين عن بعض ، وكل شخص وله سؤاله وله الغرض من ورا سؤاله ، خليك ذكي وإتعلم تطلع من الناس الكلام اللي هما مش بيكونوا عارفين وإستعين بقراءات في طرق متابعة عملائك

آخيرا ♦

كـ نصيحة يعني وممكن تعملها وممكن ترميها البحر ، مش أي حد قعد كتب سطرين علي صورة بقا ماركتير. لأن الموضوع أعمق من مجرد شوية كلام بيتكتب. لذلك فكّر مرتين وإنت بتختار شركة التسويق اللي هتتعاقد معاها ، إسألهم علي عملائهم السابقين ، شوف نماذج لشغلهم ، عشان تطمن -فعلا- علي فلوسك

تصنيفات