tips-to-improve-your-facebook-marketing-skills

بديهيات لعبة التسويق على فيسبوك

تعالى نفترض إن التسويق على فيسبوك لعبة ، وكل لعبة وليها قواعد وأصول ، هدف اللعبة بالنسبالك ممكن يكون المكسب ، ممكن يكون “اللعبة الحلوة” ، ممكن يكون مجرد المشاركة مش المنافسة ، في كل الأحوال هي “لعبة” والشاطر هو اللي يستوعبها

ممكن تكون بتلعبها حلو ، بس مش بتأدي الغرض الأساسي للبيزنس بتاعك على السوشيال ميديا ، وممكن تكون بتلعبها بشكل مؤدي للغرض جدا ، لكن مبيحصلش عندك نتايج مُبهرة لأنك بترتجل أو لانك عارف الصح بس مش عارف تعمله

ومن خلال مجموعات مختلفة من الـتجارب والخبرات ، وصلت لمجموعة نقط هافصّلها هنا في المقال ده. ممكن مكونش أول بني آدم أقولهم ، لكن هما مُهمين ، ولازم نستوعبهم ونأكد عليهم أكتر من مرة ، المطلوب منك في قراءة الـمقال ده إنك تستوعبها ، وتطبقها علي البيزنس بتاعك وتقيس الإختلافات اللي حصلت لو حصلت إختلافات

اللعبة في أبسط صورة ليها مكونة من 5 خطوات ، ممكن يتعملوا علي التوالي أو علي التوازي ، وتقدر تقول إنها دايرة ، كل خطوة فيها بتسلّم اللي بعدها ، مُخرج الدايرة الأساسي والنهائي هو الهدف اللي إنت حاطه أصلا لتواجدك علي الـسوشيال ميديا ، الخطوات دي زي ما في الصورة كده

Content المحتوى ♦

 المحتوي هو ببساطة عبارة عن نص كتابي واضح وله سياق محدد وطريقة تعبير واضحة وهدف واضح

الأولى والتانية بيخدموا علي التالتة ، والتالتة بتقدر تقيسها من خلال التفاعل اللي .  بيحصل عندك ومدي تفاعلك معاه. وفي كتابة المحتوى دايما محتاج دايما تكون سمارت

المكتوب يكون مُحدد ، مُحدد بوقت ، واضح ، قابل للتحقيق ، وقابل للقياس ، سواء المحتوى اللي كاتبه كان سطرين أو كتاب أو ألبوم صور. كل عامل من دول بيأثر على المحتوى اللي مقدمه ، والنتايج اللي بتجيلك

 في المحتوي مش دايما هتحتاج توضح وسائل التواصل معاك – خصوصا لو كانت زي كده

والهاشتاج مش وظيفته إنه يلون الكلام #سبحان_الله وعمرك ما هاتشوف شركة كبيرة كحجم في السوق أو كمنتج. صفحتها علي الفيسبوك #مثلا #بتعمل_الجريمة_دي

المحتوى لازم يكون له هــدف ، مش هاتستفيد حاجة لما تنزل بوست لمجرد إنك بتنزل بوست ، والـتفاعل مش بيخلي شكل الـبيدج حلو وخلاص ، لازم كل كلمة تخرج تكون بهدف ولمغزي معين

المحتوي فيه تفاصيل صغيرة جدا لكن بتفرق ، علامات الترقيم مثلا ، الـ إيموشنز مهمة جدا ، في إيموشن تبيع وفي واحدة تاني تقفلني من البوست كله من الأساس ، الهمزات والأخطاء الإملائية مهمة برده ، حاجات كده بسيطة جدا ، لكن فعلا بتفرق

المحتوي فيه حاجات كتير ممكن تتقال ، لكن إكتفي بدول بس وإبدأ طبقهم في الأول

Design التصميم ♦

خلينا نتفق مع بعض ، إن التصميم عموما علي السوشيال ميديا هدفه الأساسي إنه يكون (ملفت للنظر + مؤدي للغرض) وبالتالي إنت مش محتاج مصمم جرافيك عبقري مجابتوش ولادة عشان يعملك حملة عبقرية ، وعشان أثبتلك ، واحد من أساتذة التسويق في مصر د.تامر صلاح ، ممكن تلاقيه منزل بوست التصميم بتاعه كده

أكيد شخص زي ده مش هايفوته نقطة زي دي ، ولو مشافش إنها مفيدة مكانش عملها

 بالنسبة بقى لباقي عوامل الـ تصميم سواء إنه يكون فيه إبداع أو إنه يكون مبهر وإنه يكون ألوانه وخطوطه وكل الكلام ده “شكليات” مفيدة جدا ، بس مش رقم 1 ، ولو عملت كل الكلام ده ومحققتش المعادلة اللي فوق ، مش هاتوصل لحاجة

في تصميمات معينة تنفع جدا للأوت دوور لكن مش مؤدية لنفس الغرض على السوشيال ميديا ، هنا إنت مش محتاج أكتر من إنك تكون (مُلفت للنظر + مؤدي للغرض) وبس

ADS الإعلانات ♦

خلينا نتفق إن 90% من اللي شغالين على السوشيال ميديا في مصر إتأثروا الفترة الأخيرة بتغيرات عناصر تنفيذ الإعلان على فيسبوك ، إحنا من الناس اللي شفنا إن اللي حصل ده مفيد أكتر من كونه مُضر ، لأن التسويق علي سوشيال ميديا وصل في فترة معينة في مصر لأنه أي بني آدم معاه كريديت بيكتب أي كلمتين ويموّل ، والتايم لاين إتحول في فترة معينة لسوق ، يمكن اللي حصل ده حجّم ناس كتير ، ولكن المُحترف فيهم هو اللي كمّل لغاية ما إتحل معاه الموضوع ، لكن تعالي أقولك علي كام حاجة صغيرين جدا

 نص الناس في مصر كاتبين لوكيشن علي الفيسبوك غير اللي هُما قاعدين فيه أصلا ، فلو إستهدافك عن طريق الـ لوكيشن بس وارد تكون بتوصل فعلا بس لناس غير اللي إنت عاوز توصلها

الكامبين الإعلانية أصلا وإنت بتختار الـ هدف بتاعها ، لازم تكون فاهم أبعاد كل هدف وايه وليه تختاره ومتختارش هدف تاني  الموضوع مش مشاهدات أو تفاعل وخلاص ، الموضوع في ما وراء الكلام ده وإزاي وعلي أساس إنت بتلعب ، ولعبة الإعلانات عمرها مكانت علي المدى القصير أو إنه إحنا نعمل إعلان عشان شكل البوست يبقي حلو كده ولطيف والشريط البرتقاني الغامق الجميل ده ينووور ويزيييييييييد ، مبتتحسبش كده والله ياخوننا

 بلاش تتعامل مع الإعلانات زي ما بيتعامل كوبر مع المنتخب ، كل اللي يعرفه باصي لصلاح فبلاش يبقي كل تعاملك مع الإعلانات موّل وخلااااص

Responding التفاعل مع المتابعين ♦

بصراحة ، خير ناس ممكن تتعلم منهم التفاعل مع المتابعين هما فودافون وإتصالات وتي إي داتا ، روح إتعلم منهم اللي هما بيعملوه وبعديه فورا أرميه ومتعملوش. لإنك مش بس مش هاتحقق الهدف ، ده إنت كمان ممكن تخسر عملاء بسبب التفاعل مع المتابعين اللي بالمنظر ده

 فكر مرتين قبل ما تاخد رد فعل معين علي أي كومنت ، كل حالة وليها ظروفها ولو إنت مش مستوعب تكنيك التواجد علي سوشيال ميديا هتلاقي نفسك مش قادر تحدد خواص كل حالة وإزاي تتعامل معاها

في منتجات ينفع تقول السعر في كومنت ومنتجات محتاجة تبعته إنبوكس ، ومنتجات تخلي السعر للي يتصل تليفونيا مش على الصفحة أصلا. مش وحش علي فكرة إنك تحتفظ بمعلومة السعر لأشخاص معينين ، بالعكس ده هو الصح بعينه

 التفاعل مع المتابعين مش تأدية واجب ، ياما تعاقدات راحت بسبب الأستهتار بأهمية الرد علي الناس في الكومنتات ، وممكن تعرف أكتر عن خطوات تساعدك على متابعة عملائك ، فحاول تفكر مرتين برده قبل ما ترد علي أي كومنت

Insights التحليلات ♦

 إذا فاكر إنك متقدرش تستفيد بالسكشن ده تبقي فايتك كتير جدا ، شخصيا بشوف إن اللعب كله علي اللي بيظهرلي من السكشن ده أساسا ، وخلينا نتفق إن كل نقطة فيه مهمة جدا ، ولكن تركيزك الأساسي بيكون علي الحاجات اللي معمول جنبها سهم في الصورة دي

Page Viewsالـ

دي بتعرفك اللي بيتابعوك بيشوفوا صفحتك من أنهي مصدر ، يعني إنت مثلا عامل بيدج وحاطط اللينك بتاعها في الموقع بتاعك وفي كام موقع تاني ، إزاي تقدر تقيس مدي التحويل من المواقع دي للصفحة ، طب هل اللي بيجيلك من الـهوم كفاية ومتناسب مع الـ بيج لايكس ولا أقل ، التفاصيل الصغيرة دي بتفرق جداااا

Actions On Pageالـ

دي بتعرفك اللي بيتفاعلوا مع صفحتك بيجوا منين ، وأعمارهم وأماكنهم ومعلومات تاني عنهم .. كل معلومة من دول ممكن تساعدك في تحسين أدائك بشكل ما .. ومع الوقت هتلاقي نفسك بتوصل لعملائك أكتر وأسرع وأحسن

Postsالـ

 دي بتعرف منها 3 معلومات مهمين جدا وهما  الأيام اللي فيها تفاعل عالي علي صفحتك والساعات اللي فيها معظم متابعي الصفحة أولاين وأحسن نوع محتوى بيحصل عليه تفاعل

تخيل بقا لما يكون معاك المعلومات دي ، هاتقدر تحسن قد إيه من سير البيزنس بتاعك علي الفيسبوك بالذات

Peopleالـ

السكشن دي بيعرفك الزيارات اللي بتحصل عندك في الصفحة منين بالظبط ، ونوعهم إيه ، وده بدوره بيساعدك في الأستهداف الإعلاني والإستهداف بالمنتج ككل ، لأنه بيقربك أكتر من اللي مهتمين بيك من الأساس

لو وصلت لغاية هنا فـ حمدلله عـ السلامة

الخلاصة إنك ممكن تكون بتلعبها حلو بس مفتقد لأساسيات اللعب . وده بيخسرك كتير

وممكن تكون بتلعها حلو والأساسيات عندك سليمة لكن مش فاضي كفاية تتابع اللي بتعمله وتستمر عليه

و ممكن تسيب كل الكلام ده لمتخصص تسويق رقمي يقوم بيه ، لكن لازم وإنت بتعمل كده تكون فاهم الدور اللي المفروض المتخصص ده يقوم بيه

تصنيفات