خمس-نصايح-مهمة-لكل-أم-رائدة-أعمال

خمس نصايح مهمة لكل أم رائدة أعمال

لأنك رائدة أعمال عظيمة ، قدرتي تجمعي بين مصاعب الأمومة وتحديات سوق العمل. وقررتي يكون ليكي مشروعك اللي تديريه بنفسك وتحققي من خلاله ذاتك. وتشوفيه بيكبر قدامك مع أطفالك ، هقولك على خمس حاجات في التسويق والبيزنس عموما يساعدوكي في مسيرتك وحياتك

إتعلمي مهارة التأثير في 3 كلمات ♦

وده بسيط جدا ، وحجر الأساس فيه هو إنك تكوني واثقة من نفسك وقدراتك ، من خلال تجاربك العملية في السوق ومن خلال المُدخلات اللي بتحصلي عليها كل يوم في البيت والشارع والشغل ، طول ما أنتي واثقة في اللي بتقوليه ، وعندك درجة المصداقية اللي تخليكي مطمنة لتنفيذ اللي بتقوليه ، هاتقدري تأثري في اللي حواليكي من أول كلمة هاتخرج منك

أطفالك يقدروا يساعدوكي جدا ♦

بالإضافة لإنك ممكن تتعلمي خمس مهارات تسويق من الأطفال ، فالعامل المشترك بين صعوبات إنك تكوني أم وصعوبات سوق العمل ، إنك محتاجة تقدمي للأتنين قيمة حقيقية تساعدك علي الأستمرارية وتساعد أطفالك وعملائك علي النمو والرضا وتحقيق وإشباع رغباتهم. عشان كده ممكن جدا تطلعي من أطفالك ومن ملاحظاتك عليهم وبشوية تفكير أفكار حملات تسويقية عبقرية ، تأثري بيها في سوق العمل بأفكار هي في الأساس مستوحاه من أطفالك ، الموضوع بسيط وممتع

إدارة وقتك 40% من نجاحك ♦

زمان لما كنتي لسه مش ماما ، كان كل وقتك ملكك ، لكن دلوقتي ، وقتك متقسم بين بيتك وشغلك وأطفالك وحياتك الشخصية ولو في نفس ممكن تنامي ، عشان كده لازم تكوني عارفة بتصرفي وقتك في إيه ، وبتصرفيه علي إيه ، وإيه العائد من كل دقيقية بتضيعيها

لازم تتعاملي مع الوقت علي إنه عملة -نادرة- وبتخلص بسرعة جدا ، عشان تقدري تديريه بشكل سليم ، وده تقدري تعمليه من خلال التجربة والتسجيل ، هاتقدري تعرفي إمتا وقد ايه الوقت اللي محتاجاه لكل خطوة أو تاسك سواء في بيتك أو في شغلك أو مع أطفالك أو حتي مع العملاء اللي بتواجهيهم. عشان كده زي ما الببرونة متعلقة في رقبة طفلك ، لازم تعلقي الورقة والقلم في رقبتك جنبها

زودي معرفتك بالإنترنت ♦

إحنا في 2018 ، وحاجات كتير دلوقتي ممكن تخلص وإنتي قاعدة في بيتك من خلال التليفون واللاب توب. خصصي جزء من وقتك ومن مساحات أجهزتك لبرنامج تساعدك على إنجاز شغلك بسهولة أكتر وأنتي قاعدة في البيت ، كمان مش شرط تعتمدي على موظفين بمرتب ثابت لو المهام اللي محتاجاها ممكن ينفذها أشخاص بيشتغلوا بشكل فريلانسنج على الإنترنت ، ده هيساعدك توفري وقت ومجهود لبيتك وأطفالك أكتر

إعتمدي على قوة مهارتك ♦

خلي إعتمادك الأساسي في شغلك على تسويق مهاراتك ودقتك في تنفيذ شغلك ، مش على حجم معارفك. لأن مهما كان حجم معارفك ضخم ، هايخلص ، ولو أنتي مش متمكنة من تسويق مهاراتك بشكل إحترافي يبهر كل شخص يسمعك ، هاتشتغلي لفترة معينة ثم هاتقفي تماما ، لذلك إعرفي أكتر عن إزاي تقدر تسوقي مهاراتك سواء على الأنترنت أو في معاملاتك اليومية

خليكي دايما واثقة في قدراتك ♦

كونك أم ورائدة أعمال في نفس الوقت ده معناه إنك شخصية مُقاتلة بفطرتك. وعشان كده لازم تتأقلمي مع تغييرات السوق المستمرة وكمان تواكبي كل جديد. ده هيساعدك في شغلك كتير ، وكمان هيساعدك في تطوير طريقتك في تربية أولادك تربية تنفعهم في المستقبل وتخليهم مُعتمدين على نفسهم بفطرتهم فضل تربيتك

وزي أي حد ، هتقابلي تحديات كتير هاتحسي في الأول إنها أضخم منك. لكن مع إصرارك ومرونتك في التعامل مع الأمور هاتعديها وهاتوصلي للوقت إللي تفتكري فيه التحديات دي وتضحكي من قلبك بجد

Categories