Seven-things-must-avoid-on-social-media-arabic-content

سبع حاجات توقعك على السوشيال ميديا

شريحة كبيرة من اللي دخلوا مجال التسويق مكانوش فاهمين حاجة فـ أول 3 شهور علي الأقل. مكانوش فاهمين إطلاقا هما المفروض يتكلموا عن المُنتج ولا عن الـشركة ولا يبيعوا ولا يعملوا دعاية. وطبعا لأن الحماس هو بطل المرحلة دي ، كتير مننا بيقرر يكمل وهو مش فاهم من أجل إنه يحاول يفهم ، سواء بإنه يشتغل في شركة تسويق رقمي ، أو يشتغل لصالح شركة معينة

وبغض النظر إذا كنت وإنت بتقرأ المقال ده فاهم إنت بتعمل إيه كشخص بيمارس مهنة التسويق ، وبغض النظر إن النقاط اللي جايه ممكن تكون قريتها قبل كده ، فهي فعلا من أهم حاجات توقعك على السوشيال ميديا ولازم تاخد بالك منهو في صفحة أو موقع الشركة اللي إنت شغال عليها ، ولو بتعملهم ، فأحب أطمنك إنك كده (بتدمر) الشركة دي بالتدريج

تكرار المحتوى ♦

بلاش تنشر نفس المحتوي اللي بتقدمه على فيسبوك مثلا على أي موقع تواصل إجتماعي تاني ، خلّي كل منصة بتشتغل عليها ليها المحتوى الخاص بيها ، في تقريبا 26 نوع لشكل وغرض المحتوى وكل نوع وله المكان اللي يكون موجود فيه

طبيعة كُل قناة تسويقية ♦

في نفس السياق ، تفسير إنك متعملش الجريمة اللي فوق دي ، إن كُل منصة ليها طبيعة مختلفة تماما عن غيرها ، سواء من ناحية طبيعة المُستخدمين الموجودين أو من ناحية أنشطة و سبب وجود الجمهور ده على المنصة دي

محتوى له لزمة ♦

بلاش لو سمحت تفتح لابك وتفتح المنصة اللي شغال عليها وتكتب ” لو سهران دلوقتي دوس لايك” أو “أكتب تاريخ ميلادك واللي زيك يعملك يضيفك” مرحلة جروبات الملتقى دي ملهاش أي صلة بالبيزنس والتسويق من أي إتجاه

أسلوب البياع السريح ♦

وفي نفس السياق ، أنا كشخص عملت لايك لصفحة البيزنس بتاعك مش بيديك الحق إن كل اللي بينزل على صفحتك يبقى“ أشتري ، أشتري الآن ، أشتري وخد خصم ، أشتري منتجنا عشان إحنا حلوين ، أشتري وخد بالونة هدية ، أشتري قميص كارت شحن بدلة ولاعة فلاية ” عشان أنا كده هابقى ركبت مترو الساعة 2 الضهر مش عملت لايك لصفحة فيسبوك

إعلانات مالهاش لزمة ♦

وعشان نبقي إتكلمنا في الحتة دي بزيادة ، مش لازم كُل ما تُكح تروح تعمل إعلان مدفوع للكحّة اللي كحيتّها ، مش بقول متعملش إعلانات ولكن خلّي المحتوى بتاعك له جوده تجيبلك زيارات طبيعية تخليك تفكر في القيمة اللي بتقدمها من تواجدك على السوشيال ميديا ، مش بتفكر بتجيب كام لايك

إعمل عكس العشوائية ♦

فريق الكورة اللي بينزل ماتش من غير ما يكون عامل خطة لازم يخسر ، طب لو عمل خطة ، فيبقي في إحتمالية إنه يكسب ، مش أكيد إنه لما يعمل خطة هايكسب ، بس لما هايعمل خطة ، هايبعد عن الخسارة ويقرب من المكسب . حضرتك بقا علي السوشيال ميديا والعالم الرقمي عموما ممكن تعتبر نفسك في ماتش تقيل ، ولازم تكون جاهز ، وأبسط تجهيز ممكن تجهزه إنك تعمل خطة وإن يكون لك إستراتيجية معينة علي أساسها إنت شغال وبتحررك

شتت نفسك ♦

وأخيرا ، إنك تكون موجود علي 12 موقع تواصل إجتماعي مختلفين عن بعض فـ أول سنة ليك هوّ تاني أغبي حاجة تعملها بعد إنك تطلب من الناس إنها تدوس لايك ، التركيز على منصة أو إتنين بالكتير وتكثيف المجهود عليهم هيساعدك تنقل متابعينك فيما بعد من منصة للتانية ، وهيساعدك تقدم محتوى له لزمة لمجهورك

دي كانت أهم حاجات توقعك على السوشيال ميديا. وممكن تقرأ المقال ده لو عاوز تعرف إزاي تلعب تسويق على فيسبوك

تصنيفات