seven-steps-for-stable-business-while-crisis-arabic-content

سبع خطوات تثبّت شركتك وقت الأزمات

طبعا ممكن يكون العنوان غريب شوية ، لكن فعليا تقدر بشوية خطوات تثبت شركتك وقت الأزمات ، وتكون أقل المتأثرين من تقلبات السوق خصوصا الغير متوقعة. هتلاقي في المقال ده أكتر 7 نقاط لازم تركز على تنفيذهم عشان تحسن من سير شركتك في ظل تقلبات السوق

مُنتج متوفر دايما ♦​

لازم يكون منتجك متاح للعملاء علي مدار الساعة ، من خلال موقعك الإلكتروني أو صفحاتك على مواقع التواصل الإجتماعي أو حتى على مواقع الأسواق الإلكترونية ، ولازم يكون عندك سرعة إستجابة ورد فعل للتغييرات اللي بتحصل كل يوم في السوق ومع العملاء أو مع حاجة ليها علاقة بمنتجك. يعني لو في مواد خام هاتنقص لازم تكون محتفظ بمخزون ، لو في مُنتج جديد منافس لازم تتابعه ، لو في طريقة إختيار جديدة للعميل محتاج تكون متابعها. وهكذا

عرض إحترافي لمُنتجاتك ♦

لازم يكون عرضك لمنتجك علي الإنترنت بشكل عام والسوشيال ميديا بشكل خاص مميز وقوي وكفئ. ومحتاج تلغي من دماغك مبادئ عرض المنتج في مكانه وإعلانات الشارع والتليفزيون وخصوصا على الأنترنت بشكل عام والسوشيال ميديا بشكل خاص ، وتقدر تعرف أمثل طريقة لعرض المنتج على الموقع من خلال إمكانيات الموقع نفسه وطريقة إستغلالك ليها ، سواء بألبوم صور في موقع ، أو عرض بزاوية 360 في موقع تاني. وهكذا

متفوتش فرصة ♦

أستغل كل مساحة في موقع أو قناة تواصل إجتماعي مسموحلك فيها تعرض منتجاتك ، زي إمكاينة طلب منتجك من صفحتك أو من المتجر الإلكتروني بتاعك. ولو مفعل المساحات دي بالفعل ، لازم تعالج أي بذور مشكلات ممكن تحصل مع شركات الشحن أو طرق الدفع الأونلاين من البداية. لازم تشتغل علي تحسين علاقة البراند بتاعك بالشركات اللي بتتعامل معاك وبتتعامل برده مع عميلك

إتجاه جديد لخدمة العُملاء ♦

مبقاش كفاية إنك تعتمد بس علي فريق المبيعات لتحقيق مبيعات ، وبقا الأحسن والأفضل إنك تدخل خدمة العملاء في منظمومة المبيعات ، بس مش بشخصية موظف خدمة العملاء ولكن بشخصية مسئول المبيعات اللي يقدر يفتح بيعة مٌحتملة من مكالمة تليفون

خلي عندك رؤية ♦

لازم يكون دورك كصاحب بيزنس هو توقع ردود الفعل المستقبلية لعملائك ، من خلال الإحصائيات اللي بتجمعها ، ومن دراسة عملائك السابقين دراسة تفصيلية. لازم تكون فاهم إن كل معلومة خاصة بمنتجك مباشرة أو غير مباشرة أنا كعميل هاقدر أوصلها ، لذلك لازم تكون متوقع لرد فعل العميل اللي ممكن يكون جاي يشتري بعد ما كوّن خلفية عن اللي هايشتريه أقوى من خلفيتك شخصيا عن منتجك

customizationركز على الـ ♦

السوق الحالي أصبح بيتمتع بمنتجات بتعتمد علي إنك بتفّصّل منتج لكل عميل علي حده ، لازم بقا في طريقة عرضك وتسويقك لمنتجك تفصله عن باقي المنتجات اللي بتقدمها. فلو بتقدم ملابس ، طريقة عرضك وتسويقك للقميص محتاجة تختلف عن التي شيرت ، محتاجة تختلف عن باقي منتجاتك

والنقطة دي إنت هاتكون فاهمها إداريا ، بس كتسويق أو عرض هاتحتاج فيها كوبي رايتر يساعدك فيها أكتر من خلال خبراته في إستيعاب سلوكيات العملاء وتصرفاتهم ورؤيتهم لعالمهم عشان يقدر يصمم لك طريقة عرض مناسبة لمنتجك

.. وأخيرا ♦

وآخيرا ، لازم تكون عندك القدرة علي التطوير السريع لمنتجاتك وتفاصيلها عشان تناسب  التغير اللي بيحصل في السوق. وتكون دايما جاهز للعمل وقت ركود السوق

والخلاصة إن الوقت اللي ممكن يكون بالنسبة لكل الناس أزمة ، يكون بالنسبالك إنت فرصة جديدة لتحقيق مكاسب مش بس مادية ، ولكن مكاسب طويلة المدي ومنافع هاتفضل معاك سنين ، ده لو بس أستوعبت وعدلت طريقة تفيكرك

تصنيفات