العمل الحر | 30 معلومة عن اسلوب حياة العمل الحر

تجربة حقيقية للعمل الحر من المنزل لمدة 5 سنوات
النقاط اللي جاية دي مكتوبة من تجارب +5000 يوم شغل
كـFreelancer Work From Home ONLY حرفيا.

0- مفيش شغلانة اسمها فريلانسر.
الفريلانسج بدون إمتلاك مهارة هو وهم، عشان تبدأ رحلة العمل الحر محتاج تتعلم مهارة واحدة على الأقل وتكون مطلوبة في سوق العمل. لو معندكش مهارة يبقى معندكش حاجة تشتغلها وتجيب لك دخل مادي.

1- الفريلانسر حُر من مواعيد العمل الثابتة اليومية الروتينية إلي حد ما، والحرية دي بتاخدك بعد كام سنة لمنطقة كسل واسعة ومُرعبة. لو مظبطش بنفسك وقت ثابت للشغل، كل يوم، هتلاقي الايام بتخلص والشغل مبيخلصش.

2- الفريلانسر لازم يدير ويخطط وقته بفاعلية أعلي من مواعيد العمل الثابتة اليومية، لازم يحدد ميعاد محدد لصحيانه ولشغله ولأكله ولعيلته ، لأنه لو معملش كده هايتحول لآله، أو التسويف هيقضي عليه.

3- الفريلانسر لازم يخلق لنفسه بيئة عمل مناسبة، وتكون بيئة من خياله بتحفزه للشغل، بجانب إنه يخلق روتين خاص بيه، لأنه لو معملش كده هايتدحرج علي الـComfert Zone أسرع من الصوت.

4- الفريلانسر مدير نفسه، وده شئ لطيف جدا، معناه إنك إنت اللي هاتحط لنفسك الـTasks والـDeidlines وإنك إنت اللي هتعدل علي شغلك وإنت اللي هتحمس نفسك وإنت اللي هاتوبخ نفسك. ولازم وإنت بتعمل كل ده تطلع Quality عالية عشان معندكش رفاهية وجود مدير يقولك قشدة نظبط معاك دي وتتعلم في اللي بعدها، لو مطلعتش Quality عالية كل مرة، بنسبة كبيرة مش هايكون فيّ بعدها.

5- الفريلانسر مش دايما بيقبض بالدولار، بيقبض بعُملة الكلاينت. وعادي تلاقي عُملاء ناوية تديك بالباقي لبان، وإتفاقك وبنوده هما اللي بيحددوا شكل وحجم قبضك، بجانب جودة شغلك طبعا ومدى مهارتك في تخصصك.

6- الفريلانسر محتاج يعلم نفسه بإستمرار لأنه حرم نفسه من فرصة التعلم الجماعي اللي ممكن تحصل جوه بيئة الشركات، ومهاراته الأجتماعية بتكون أقل من اللي بيروح الشركة ويقابل أشخاص كل يوم. واللي مش هايعلم نفسه بإستمرار مش هايشتغل. بجد مش هيلاقي شغل.

7- الفريلانسر المبتدئ و الفريلانسر المحترف، الفرق بينهم بعد خبراتهم، يكمن في إدارتهم لنفسهم وشغلهم والقواعد اللي بيحطوها عند أي تعاقد ، وأهم فرق بين الإتنين هو الإلتزام.

8- الفريلانسر وخصوصا اللي بيشتغل من البيت معظم الوقت، عادتا ظهوره إجتماعيا بيقل. وعادتا ده مش بيكون بمزاجه، هو نفسه يكون إجتماعي بس الشغلانة تحكم ، زي ما هتلاقي النجار إيده فيها رايش خشب، المهنة تحكم.

9- الفريلانسر اللي بيشتغل من البيت صديق وفي لفيتامينات (د) و (B12) و (اوميجا3) لانه مش بيتعرض كفاية للشمس وده بياثر على الصحة والتركيز والإنتاجية.

10- الفريلانسر المتخصص أحسن من الشركة القائمة علي شخص واحد، وكل ما تسعي في طريق التخصص لجزئية معينة مطلوبة في السوق وتزود مهاراتك فيها، كل ما هاتكون مميز ومطلوب في السوق والتخصص اللي بتشتغل فيه.

11- الفريلانسر بينظم اجازاته لنفسه وحقيقي لو محددتش لنفسك مواعيد اجازات هيفضل الشغل في دايرة مستمرة مبتخلصش. وعلى فكرة عنده إمكانية إنه ياخد اجازة يوم، بس مش شرط يقدر يظبط الإمكانية دي مع نفس يومك، راعي ظروفه 😀

12- الفريلانسر مبياخدش مرتب ثابت، ممكن في شهر يعمل $$$$ ويقعد 6 شهور بعدها بيعمل $ علي أعلي تقدير، لذلك لابد للفريلانسر إنه يتعلم ويتقن مهارات الـExpense Management والـMoney Management.

13- معظم الناس بره دواير شغلك مش هاتبقي فاهمة إنت بتعمل إيه ، فُكك وكمّل متزهقش.

14- في مواقع كتير ممكن تشتغل عليها كـ فريلانسر، منها خمساتUpworkFiverFreelancerمستقل وغيرهم، المواقع دي مليانة فرص وهتلاقي فيها مساحة عظيمة وتقدر تبدأ منها شغل.

15- لكن أنا من أنصار إنك طالما هتشتغل Freelancer يفضل تبدأ تبني الـPersonal Branding identity بتاعتك وإنك تكون شخص تفاعلي أونلاين وعلي الأرض، 90% من الشغل اللي جالي كان عن طريق صفحتي وعن طريق إعلاني بأني بدور علي شغل وآخيرا عن طريق الـRecommendations. وده مش معناه إن المواقع اللي فوق ملهاش لزمة ، بالعكس ، إطلاقا ، أبدا.

16- في الإتفاقات المادية، خليك صريح ومُحدد وقلبك جامد طالما شغلك محترم، ويا إما الدفع يبقي 50% يدفعهم العميل يستلم قصادهم نص الشغل في الميعاد المحدد ثم الـ50% الآخرى ويستلم باقي الشغل، وإما المبلغ كله مقدم. أي تساهلات تاني تعملها بعد ما تكون إتعاملت مع العميل ده فترة أكتر من 6 شهور على الأقل، وإتقابلتوا مرة أو أكتر، وبرده التساهلات متكونش في القيمة السعرية قصاد شغلك ولكن في طرق السداد. مش كل العملاء شياطين، لكن مش كلهم ملايكه.

17- ولو هاتمشي بالستراتيجي اللي قولتها في الدفع في النقطة اللي فاتت، لازم تكون جودة شغلك عالية، وسمعتك نضيفة وإحترافية. سمعتك نضيفة يعني كلمتك واحدة، شغلك لا غبار عليه، كلام الناس في المجال عنك مش وحش، حاطط لنفسك إجرائات تضمن حق العميل عليك، لأن مفيش عميل هيوافق علي النقطة 15 لو مكانش واثق في سمعتك وجودة شغلك.

18- إنت كـ فريلانسر جزء مهم من رأس مالك هو سمعتك، لو بتتأخر هتتكون سُمعة عنك إنك بتتأخر. وده معناه انك تحافظ وتلتزم بوعودك. ومتزهقش من إنك تعدل من سلوكياتك ونمط حياتك عشان سمعتك تتحسن.

19- السوق عرض وطلب، اتعود تترفض زي ما بتفرح لما تتقبل، اتعود على التعديلات وتغيير الرأي. وخليك عارف إن الشغلانة اللي مجاتلكش إنهارده، وارد تجيلك بكره أو تجيب لك شغلانة أحسن. والعميل إللي إشتغلت معاه مرة وبس، خلي معاملتك معاه إحترافية عشان يرجعلك تاني.
القصد، خلي لسانك طيب في كلامك عن عُملائك ومنافسيك، ده هايخلي اللي حواليك يحترموك ويقدروك حتي لو مفيش بينكم أي شغل، ويخلي عمرك اطول في مجالك.

20- المنافسة بين الفريلانسرز شرسة جدا وعالمية، فمش معني إنه فريلانسر إن أسعاره عالية جدا، مش معناها برده إنه بيشتغل ببلاش. والفريلانسر الشاطر هو اللي يقدر يعمل تسعيره لخدماته تكون مساوية لقيمة الوقت والمجهود والتعلم اللي بيبذله، ويكون سعره منافس للموجود في السوق اللي شغال فيه.

21- جزئية إنك تسعر شغلك هاتيجي مع الوقت والإحتكاك مع خبرات من نفس مجالك وقياس شغلهم مع مستوي شغلك، بس لازم يكون ليك فئة سعرية ثابتة نسبيا، ممكن كمان تسعر شغلك عن طريق انك تسأل اكتر من شخص شغالين في مجالك كانك عميل وشوف متوسط الاسعار وأبدأ على أساسه.

22- مهم كمان تبقى مدرك إنك بتنافس تطبيقات وبرامج لشركات عالمية ممكن تقوم بجزء كبير من مهامك بشكل اوتوماتيك واحيانا مجاني، من 10 سنين كان تصميم الجرافيك محتاج جهاز كمبيوتر عالي وبرامج تصميم وتعديل معقدة، انهارده، ممكن تصمم كل اللي بتفكر فيه على ابلكيشن مجاني على اي موبايل. لذلك هتحتاج تبدل مجهود وطاقة الصياح جواك لطاقة تطوير وتعليم لنفسك عشان تقدر تعمل افضل شغلانة بأبسط أدوات

23- الفريلانسر لابد يكون صديق وفيّ لكل المواقع التعليمية زي: UdemyCoursera وكمان المواقع المصرية زي ينفع و المنتور وأكيد الفريلانسر متابع لكل المبادرات اللي بتتعمل اونلاين زي الـ egfwd على سبيل المثال. دول اللي هاتستمد منهم مهاراتك ومعلوماتك، دول اللي هيأثروا مع الوقت علي تحسن جودة شغلك وبالتالي هايعلوا من فئتك السعرية، مفيش فريلانسر مبيتعلمش طول الوقت.

24- الـsearsh هو نشاط يومي بيقوم بيه الفريلانسر، مش بيعطل على معلومة وعنده الجرأة يفتح جوجل ويبحث عن اي مصطلح يقابله، عادة يومية في شغلك وحياتك. ومهارة هتخليك تكتسب معرفة غير محدودة.

25- الفيلانسر لازم يتعلم الصبر / طولة البال / الرد بأسلوب مهذب ودبلوماسي / ويتحمل فكرة إنه بيتعامل مع العملاء مباشرة وبالتالي هو لازم يكون Updated وفايق طول الوقت.

26- الفريلانسر (المحترم) لما بيكون مبيعرفش يعمل حاجة بيقول معرفش، ولا بياخدها لغيره ينفذها ولا بيفتح دراعاته ويخبط فيها. الجزئية دي مهمة جدا جدا، وياما عملاء رشحوني لعملا تانيين عشان بس (الشخص ده لو في حاجة مش بيعرف يعملها هيصارحك ويوجدلك بدايل تختار منها). لا بيجود ولا بيفتي ولا كل هذا الكلام اللي يقطع عيشك ويهد سمعتك مع التكرار.

27- إنت ممكن تشتغل Freelancer لأكتر من 500 شغلانة، دور علي مواقع الشغل الفريلانسج وهتلاقي مسارات شغل كتير ممكن تشتغلها منها المعقد زي التصميم المعماري، ومنها البسيط زي انك توصل طلبات في منطقتك، متصعبش الأمور على نفسك في البداية عشان تعرف تستمر.

28- الفريلانسر مش حُر نفسه ولا حاجه. هو بس بيرتب اولوياته بنفسه. وبيدفع ضريبة خطواته بكامل وعيه وإدراكه مش على حسب ما الشركة والمدير والخطة السنوية ما بتقول.

29- الفريلانسر مش مُرّفه ، عنده التزامات زي اي بني آدم. وزي اي بني آدم برده ، لو مشتغلش بإحترافية وإتقان مش هايحقق اي التزام.

30- خليك عارف إن الفريلانسر مش مدير نفسه -أوي- يعني، كل كلاينت جديد بتفتح معاه شغل هو ghost manager، وكل كلاينت بتكمّل معاه شغل شهر ورا شهر هو شريك في شغلك.
وهما الاتنين بيتعاملوا معاك as a tool or service provider. وليهم طموحاتهم واحلامهم والاوامر الدورية اللي لازم تهندلها كل يوم عشان تفضل شغال وسُمعتك إيجابية.