The-difference-between-Newsjacking-Social-Responsibility-Social-Celebration

صيد الأحداث - المسئولية المجتمعية - الإحتفالات الإجتماعية! ما الفرق بينهم

الأهتمام بالتفاعل المستمر مع المُستخدم -اللي هو حضرتك- من أهم الثوابت على السوشيال ميديا. وقد إيه تفاعلك مع المُستخدمين ممزوج بلمسة بشرية ، مش روبوت بيكرر نفس الردود

وأحد الدلائل المُهمة في أهمية التفاعل البشري مع المُستخدمين هو تحديثات فيسبوك الخاصة برسائل المُعايدة والتضامن مع المُستخدمين. وآخرها فيديو ذكريات السنة اللي بيقدمهولك. التحديثات الخاصة بالتفاعل إتعملت عشان تعزز تواجد المُستخدم لأطول فترة ممُكنة على الموقع. ودي أهم أولويات فيسبوك ، بالتالي برضو لازم يكون أهم أولوياتك

الدليل التاني ، دراسة بحثية قامت بيها وكالة بحوث تسويق وبحوث عن المستهلك في أريزونا ، لقياس تأثير سرعة الشركات في متابعة عُملائها ومشاركتهم الأحداث المُهمة على المُستخدمينإن40% من المُستخدمين ، بيفضلوا عدم متابعة الشركات اللي مش مواكبة للأحداث. اللي مش بتعبرعن مدى اللمسة الإنسانية للأشخاص اللي ورا البراند ، وبتحسس المُستخدم إنه بيتعامل مع روبوت مُتكلم بس.

بالتالي مفيش جدال على إن متابعتك لعُملائك ، وتفاعُلك مع الأحداث الجارية ، بيكون آحيانا أهم من نتائج أرباح الإعلانات اللي جيالك الشهر ده. لأن التفاعل المُستمر مع المُتابعين بيحسن من نتايج الأرباح اللي جاية

والأهم إنه بيساعدك تحافظ على متابعة المُستخدم ليك ، لأطول فترة ممكنة. الأمر اللي بدوره بيعزز الصورة الذهنية الإيجابية لشركتك. وده الهدف اللي بتشتغل عليه الشركات اللي عاوزه تكمّل في السوق ، وسط المنافسة الشرسة اللي بتزيد يوم بعد يوم.

الربط بين “الأحداث الجارية” و”الشركة” اللي بتدير شغلها على السوشيال ميديا له 3 مُسميات

 Newsjackingالـ 

social responsibilityالـ

  Social celebrationالـ

صيد الأحداث Newsjackingالـ ♦

صيد الأحداث بيكون ربط “حدث غير متوقع” بشغلك ، ولكن مش أي حدث مُفاجئ تتكلم عنه. لأن كوكب الأرض بتحصل فيه أحداث مُفاجأة كتير ومش بالضرورة تهم أي حد

الحدث المُفاجئ اللي تتكلم عنه ، هو اللي بينتشر على مواقع التواصل الإجتماعي بسرعة جدا في وقت قُليل. وبلغة التسويق هو الحدث اللي بيبقى تريند ، بتحصل عليه آلاف المشاركات في ساعات قليلة. وممكن تستمر لأيام كمان

في شركات بتقدر تستخدم “صيد الأحداث” بشكل يحسن من تفاعل المُستخدمين بدون إفراط. وفي شركات بتعمل الخطوة دي بشكل دوري ، وآقرب ما يكون لإستخدامه كإستراتيجية تسويقية. وأشهر مثال عربي في الجزئية دي هو تودو كيك ، والحقيقة إن الطريقة المُستخدمة في حالة تودو كيك هي سلاح ذو حدين

– الحدّ الإيجابي: هو إنه قدر يربط مُستخدمين السوشيال ميديا بطريقته وأسلوبه لدرجة إن المتابعين وغير المُتابعين بقوا يستنوا تودو كيك هاتركب التريند إزاي. وده عظيم جدا

– الحد السلبي: بيتمثل في عزوف فئة كبيرة من مُتابعين ومُحبي تودوكيك ، عن الإهتمام بالمنتج نفسه. في مقابل إرتباطهم بشخصية تودو اللي بتتفاعل معاهم

ولكن الجزئية دي مش سلبية 100% لأن في أمثلة كتير لإستخدام “شخصية البراند” وتصديرها بشكل قوي حدّ إرتباط العُملاء بيها ، ومع ذلك متأثرتش مبيعاتها على الإطلاق

أشهر مثال على كده هو كاركتر ماكدونالدز ، واللي أصبح براند في حد ذاته. بيتنفذ منه ملايين النماذج عالميا بغرض البيع ، بالإضافة للعرايس الضخمة اللي بُتستخدم في العروض الخاصة بسلسلة المطاعم زي أعياد الميلاد والحفلات البسيطة للأطفال

وعشان تقدر تستفيد فعلا من صيد الأحداث ، لازم تتأكد من أساسيات مُعينة قبل ما تشارك في أي تريند. زي إنك تشوف مدى ملائمتها للجمهور اللي بتستهدفه ، ومدى إرتباط الحدث بالمُنتج أو الخدمة اللي بتقدمها ، ومدى تأثير مشاركة شركتك فيه. عشان متقعش في فخ إنك تصتاد تريند مُعين ويردّ في صدرك يقتلك. بتحصل للأسف

المسئولية المُجتمعية social responsibilityالـ ♦

هنا بتربط بين البراند وبين المستخدم وبين شئ موجود في المجتمع سلبي محتاج يتغير ، وبيحاول البراند إنه يشاركك معاه في مُهمة لتغيير الشئ السلبي ده. من خلال إستفزازك بإعلانات مُمنهجة غرضها مشاركتك معاهم لتحقيق الهدف المطلوب

وأفضل مثال ممكن نفتكره ، حصل في أكتوبر 2017 عن المسئولية المجتمعية ، هو الحملة إللي قامت بيها ماكدونالدز للمساعدة في مشكلة التعليم في عزبة خير الله. لما عملت حملة تبرعات وكتبت محتوى الإعلان بأخطاء إملائية – عن قصد – وقدرت فعلا تستفز مُستخدمي السوشيال ميديا وقتها ، للدرجة اللي خلقت إنتشار واسع لكومكيس وردود أفعال كتير بتسخر من الحملة بشكل مُضحك.  واللي بدوره عزز وساعد ، إن حملة التسويق تنتشر أكتر وتحقق أكتر من اللي كان مطلوب منها. أو هكذا كان مُخطط لها الله آعلم

الإحتفالات الأجتماعية Social celebrationsالـ ♦

وهو ببساطة إنك تشارك في “حدث متوقع” ومش مُفاجئ. زي المشاركة في يوم الرجل العالمي ، عيد الأم ، البلاك فرايداي ، عيد الشكر ، اليوم العالمي للصديق ، وإحتفالات الكريسماس. أيوه إللي داخلين عليه كمان كام يوم ده

وأما عن العائد البيعي من المُشاركات دي ، فبيكون على حسب نوع الحدث ، وطريقة مشاركتك فيه. ونوع الحدث بيشمل ثقافة الجمهور في التعامل مع الحدث ، ومدى تحفيزك على إتخاذ قرار الشراء منك. ولكن بشكل عام ، العائد البيعي من مشاركة شركتك في الأحداث بذكاء وخطة محسوبة ، بيكون مُرضي جدا وأحيانا مُبهر

وإذا إتكلمنا عن  حدث زي إحتفالات رأس السنة ، هنلاقي إنه مينفعش بأي حال من الأحوال تفوته. لأنه مستمر معاك طول ديسمبر ولغايه نصف يناير تقريبا ، ولأن العالم كُله بيتشارك نفس الحدث ، يعني حدث عالمي هيفرض نفسه كتريند مُستمر. بدأ من أيام أصلا

وبما إن كُل صاحب مشروع عاوز يرفع معدلات مبيعاته دايما، وعلشان ميفوتكش حدث مُهم زي ده. وبناءا على كُل ما سبق ، قررت إني أشاركك بدليل تنفيذي تقدر من خلاله تحقق نتائج بيعيه في وقت الإحتفال بالـكريسماس. وتعزز بعض أهداف البيزنس بتاعك في توقيت العالم كله مُمكن يشوفك فيه

Super-campaign

الدليل مُكون من 3 أجزاء ♦

الجزء الأول: بيشرح خطوات حملة التسويق الرقمي المُربحة. مع وجود ملف إكسيل تقدر تحدد عليه خطوات الحملة اللي بتقوم بيها سواء للإحتفال برأس السنة ، أو أي حملة تسويق رقمي تاني

الجزء التاني: بيشرح ملف إكسيل ، لتحديد الأهداف اللي هاتشتغل عليها ، والجمهور المستهدف ونوع وعنوان المحتوى ، وتاريخ وتوقيت النشر اللي هاتشتغل عليه. مُصمم علشان يساعدك تحدد المحتوى الخاص بالموقع الإلكتروني الخاص بيك، وأهم 5 مواقع تواصل إجتماعي (فيسبوك – يوتيوب – لينكدإن – إنستجرام- تويتر) واللي بتحدد تواجدك على كُل موقع فيهم بما يتناسب مع البراند اللي بتشتغل عليه

الجزء التالت: بيحتوى على أكتر من 15 فكرة تستعين بيهم في الإحتفال برأس السنة ، ويحققوا أهدافك من المشاركة في الحدث. سواء كانت أهدافك زيادة المبيعات ، أو تكرار زيارة المُستخدين لصفحتك على سوشيال ميديا. أو إنتشار إسمك التجاري لشريحة أوسع وأكبر من الجمهور

الكُتيب بسيط جدا (16) صفحة ، ومكتوب بالعربية العامية ، بمصطلحات مفهومة بدون أي تعقيد

 الدليل مجاني ، تقدر تحمّله وتشتغل عليه وتشاركه مع أصحابك. وهيساعدك في رفع معدلات أرباحك خلال الإحتفالات برأس السنة

وآخيرا ، أعظم إستثمار ممكن تحققه على السوشيال ميديا ، خطوته الأولى بتبدأ من تفاعلك المُميز مع المُستخدمين. لذلك حافظ دايما على التفاعل والمشاركة بينك وبين اللي بيتابعك ، وهاتشوف قد إيه النتايج هاتكون في صالحك

super-campaign-download

حمّل الكُتيب مجانا وابدأ في تحقيق الأرباح​

Categories